Durango nagusi atzo Mojategin

Aurkari gogorra izan zuten aurrean atzo Arrasate Errugbi taldekoek, izan ere, Durangori egin zioten aurre Mojategin, eta bizkaitarrek euren nagusitasuna hasieratik erakutsi zuten. 5-38ko emaitzarekin amaitu zen norgehiagoka. Hala ere, Julen Barrutia entrenatzailea pozik agertu zen jokatzeko aukera izanarekin.

Arrasatearrak eta ordiziarrak gogotsu ekin zioten aurtengo denboraldiko estreinakoari; hala ere, durangarrek partida hasi eta gutxira lortu zuten lehenengo entsegua. 0-7koa markagailuan zutela, etxekoak saiatu ziren bizkaitarren marrara heltzen eta gutxigatik ez zuten lortu aukera pare batean. Hala ere, durangarrak izan ziren hurrengo entsegua lortu zutenak atsedenaldia heldu baino minutu batzuk lehenago. 0-12ko markagailuarekin zelairatu ziren berriz ere Barrutiaren mutilak, eta bigarren zatiak norabide berbera hartu zuen. Durangokoak nagusitasuna erakutsi zuten, eta garaipena Bizkaia aldera eraman zuten.

Porrota alde batera utzita ostera, pozik agertu zen Barrutia. Zelaira jokatzera irtetearekin bakarrik asko irabazi zutela aipatu zuen eta Ordiziako jokalariekin batera entrenamendu falta sumatzen duten arren, taldeak erakutsitako jarrera eta intentsitate mailarekin harro amaitu zuen entrenatzaileak.

Erlazionatuak

5-38ko emaitzarekin Durango nagusi

Arrasate

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.