Gabonetako etenaldiaren ondoren, eta lehiaketa erregularra urtarrilaren 16 eta 17ko asteburura arte berrabiarazten ez dela aprobetxatuz, domeka honetan, azaroaren 8an bertan behera geratu zen partidua berreskuratzeko aprobetxatuko du Ointxek. "Nafarrak ezin ziren Arrasatera etorri garai hartan, beraz, asteburu honetan partidua jokatzeko aprobetxatuko dugu", adierazi dute Ointxetik.
Azken porrotei buelta emun guran
Mondragon Unibertsitateko jokalariak, abenduan, Zarautzen eta Santurtziren aurka izandako bi porrotetatik animoak berreskuratzen saiatu dira azken asteetan. Abenduaren 8an, Zarautzen aurka galdu zuten etxean, eta, ondoren, abenduaren 19an, Santurtziren aurka.
Aurkariei errespetua
Domeka honetako aurkariak, bestalde, –Egues– lau partidu baino ez ditu jokatu orain arte, eta bi garaipen eta bi porrot daramatza, hain zuzen ere, multzoko bi liderren aurka. "Joan den domekan, Donostiako Easo taldea mendean hartzetik dator eta ziur gaude ez digula batere erraza egingo garaipenen bidera itzultzea", adierazi dute klubetik. "Gainera, Nafarroako taldean, Lacunza eta Calvo dira jokalari nabarmenak, 24 eta 18 punturekin, batez beste, orain arte".
Partidua ateak itxita jokatuko den arren, Ointxeko zuzendaritzak zuzenean eskainiko du domekako partidua Twitch sare sozialeko Ointxetb katean.