Arrasateko gaztetxean batu dira Debagoiena osoko hainbat emakume, abenduaren 12an Oreretan egiteko aurreikusita zeuden Emakume Abertzaleen VIII. Topaketa Feministen berri izateko, eta bertan landuko diren gaien inguruan berba egiteko. Deialdia Arrasateko Bilgune Feministak egin du, eta besteak beste, harreman kolonialen ertzen inguruan hausnartu dute, dinamika saio baten.
Izan ere, aurten, topaketa feministetan bi ardatz nagusi jorratuko dituzte, eta horien gainean ere berba egin dute Arrasaten. Harreman kolonialak alde batetik, eta COVID-19 uzten ari den egoera beste aldetik. "Gai horietatik abiatu eta ondoren, horiek, gure praktika feministetara ekarriko ditugu", azaldu du Arrasateko Bilgune Feministako kide Inesa Ugaldek.