Villa Amparo eraikinaren inguruan, ur-parke berri bat eraikiko dute, "Santa Barbarako parkeak izandako arrakastari jarraiki", ibaiaren alboan. Horretarako, hainbat zuhaitz moztu dituzte langileek eta herritar batzuen haserrea ere eragin du horrek.
Udalak adierazi duenez, parkeak bi gune izango ditu: bat haurrei zuzendua, ur zirkuitu batekin, eta bigarrena gaztetxoentzat, 18 ur-jolas baino gehiagorekin. "Helburua da 2021eko ekainerako martxan egotea ur-parke berria".
Modu horretan, Udalak nabarmendu duenez, hirigintza proiektuekin aurrera darrai, "bi helburu nagusi" oinarri hartuta: "Etorkizuneko Arrasate eraiki, garapena, iraunkortasuna eta eraldaketa ekologikoa oinarri, eta tokiko enpleguaren sustapena Covid-19ak eragindako pandemiaren aurrean".
Lanak, fase ezberdinetan
Ur parkeaz gain, Maiatzaren 1 plaza eta Maalako biribilgunea lotuko dituen bidegorriak jarraipena izango duela azaldu du Udalak. "Garibaiko BUS geltokiari itxura berri bat emango zaio, motorrentzako eta bizikletentzako aparkalekuak eta TAXIen geralekua ere berregokituz. Horrez gain, Biteri eta Maalako biribilgune arteko zatia oinezkoentzat eta bidegorriarentzat bakarrik utziko da, eta ibilgailuek jada ezingo dute hortik igaro".
Grupo San Juanen berrurbanizazioari dagokion zatia, bestalde, bizilagunekin urriaren 20an egindako bileraren arabera egin beharreko aldaketak burutu ostean gauzatuko da. "Bizilagunekin adostu da arkua ez botatzea eta urbanizazioaren saneamendua berritzea".
Construcciones Moyua S.L. enpresak burutuko ditu lanak. Aurrekontua 1.729.079,97 eurokoa da, BEZ gabe. Aipatutako lan guztiak 16 hilabetetan bukatzea aurreikusten du Udalak.