Ointxeko mutilek gogotsu hasi dute partidua. Erritmo onarekin eta puntu portzentaje altuarekin. Hala, sei puntuko aldea zabaldu dute markagailuan. Baina, nafarrek berdinketa lortu dute lehen laurdena bukatzeko minutu bat falta zenean: 19-19. Dena den, etxekoak heldu dira abantailarekin, laurdenaren bukaerak markatzen zuen txirrinarekin batera hiruko jaurtiketa bat sartuz: 26-19.
Bigarren laurdenean lehenengoan izandako indar guztia galdu dute Iñaki Ogararen mutilek. Ardoi 2-10eko partziala eginez, lehen aldiz ipini da aurretik markagailuan: 28-29. Minutu horietan etxekoak nahiko galduta ibili dira erasoan, huts gehiegi eginez. Zorionez, Ardoik ez du hori baliatu abantaila handitzen joateko.
Aldagelara 39-39ko markagailuarekin joan dira.
Parekatua eta borrokatua
Atsedenaldiko markagailuan erakusten zuen parekotasun hori mantendu da hirugarren eta laugarren laurdenetan. Puntu gutxiko tartea izan da hirugarrena, eta akats askokoa laugarrena. Baloi galerak, falta teknikoak, erasoko faltak, protestak.... Bada, nafarrek 61eko berdinketa lortu dutenean (bukatzeko bi minutu eta erdi geratzen ziren), etxekoek esku-frenoa ipini diote partiduaren erritmoari. Jokaldiak landuz, eta bereziki baloi garrantzitsu bat berreskuratuz, bost puntuko aldea zabaldu dute 66-61. Azken erasoetan, defendatzea tokatu zaie.
Hirutik, hiru
Megacalzados Ardoiren kontra lortutako garaipenarekin, hirugarrena lortu du MUk. Hiru partidu jokatu dituzte, eta hirurak irabazi. Hurrengoa Tabirakoren kontra jokatuko dute.