Azaroaren 29an Jose Mari Arizmendiarrietaren heriotzaren 44. urteurrena beteko dela eta, azaro osoan ekimen ugari aterako ditu aurrera Arizmendiarrieta Fundazioak.Urri amaierarako, XXI. menderako Arizmendiarrietak zituen ideien inguruko liburua idatzi zuten Fundazioko kideek, bertsio kooperatibo eta elizkoian. Lan hori argitaratua izateko prest baldin badago ere, gizarte-egoerak hobera egiteko itxarongo dute publikoari aurkezteko.
Hil honetan egingo dituzten ekimenak honako hauek izango dira: Arizmendiarrieta Sarien banaketa, enpresen modelo inklusibo eta parte-hartzaileen inguruko ponentzia telematikoa eta meza bereziak. Arrasateko San Juan parrokian izango da Arizmendiarrietaren omenezko meza horietako bat, azaroaren 22an, 12:00etan hasita.
Dokumentala Goiena telebistan
Arizmendiarrietaren bizitza eta ideiei buruzko ikus-entzunezko bat emitituko du Goiena telebistak hilaren 26an: 'Arizmendiarrieta, gizon kooperatiboa". Ostean, Arrasateko kooperatiben sortzailea hizpide izango duen mahai ingurua egingo dute Arizmendiarrieta bera ezagutu zuten eta kooperatibismoaren munduan murgilduta dauden zenbait pertsona esanguratsuk Goienako platoan.
Gazteleraz argitaratu zuten dokumental originala, eta euskarara eta ingelesera bikoiztu dute orain. "EITBrekin eta Goienarekin jarri ginen harremanetan, euskarazko dokumentala bi hedabideetan emititzeko ideiarekin", adierazi du Angel Mari Garciak, Arizmendiarrieta Fundazioko kideak.