Hiru ordu laurdeneko atzerapenarekin hasi dute saioa, eta hasi eta berehala, Maider Morras EH Bilduko bozeramaileak hartu du hitza: "Osoko bilkura hau bertan behera uztea eskatzen dugu, herritarren aurrean ematen ari garen irudia lotsagarria da".
Elkarrekin Arrasateko Igor Urizarrek ere hala berretsi du. "Baldintza hauetan ezin dugu osoko bilkura egin. Ez dakigu gure eskubide guztiak bermatzen diren, eta guk ere bertan behera uzteko eskatzen dugu", gaineratu du.
Maria Ubarretxena alkateak eta Anuska Ezkurra Udal Gobernuaren bozeramaileak onartu dute, lehen aldia izanik, arazoak egotea normala dela, eta osasun egoera zein den kontuan hartuta, prestutasuna eskatu diete oposizioko kideei. Hala ere, azkenean ez dute bilkurarekin jarraitu, eta bertan behera uztea erabaki dute. Modu horretan, eta barne araudiak jasotzen duenez, eguenean 18:00etan egingo dute azaroko osoko bilkura. "Ordurako ordenagailu guztiak ondo prestatuta izango ditugu, bakoitza bere kamerarekin, bere mikrofonoarekin eta bere aurikularrekin, arazo barik egin ahal izateko", azpimarratu du alkateak.