Arrasateko Bilgune Feministaren sortzaileek azaldu dute "aspalditik" zeukatela gogoa feminismoaren testuinguruan espazio propioa izateko, "gure indarrak saretu, eta eguneroko ekintzak kolektibizatzeko. Era berean, azken hamarkadetan eraikitako militantzia eredua eraldatzeko beharra ere sentitzen zutela aitortu dute.
Topaketa feministetarako deia egin dute
Herriko bilgunearen sorreraren berri emateaz gain, abenduaren 12an Oreretan egingo duten Emakume Abertzalen VIII. Topaketa Feministetara batzeko deia egin dute. Gaurtik azaroaren 22ra arte egongo da izena emateko aukera, Euskal Herriko Bilgune Feministaren webgunean. "Topaketa hauetan bi ildo nagusi jorratuko dira: batetik, harreman kolonialen begirada gaurkotu bat euskal feminismotik, eta, bestetik, post-COVID-19ak utziko duen testuingurua".
Lehenengoari dagokionez, azaldu dutenez, harreman kolonialak barne zein kanpo ikuspuntutik aztertuko dituzte. "Lurralde honetatik beste herri batzuekiko bultzatutako kanpo kolonizazio prozesuak zein Euskal Herrian garatutako barne kolonizazio prozesuetan eragiten duten mekanismoak".
Bigarrenaren kasuan, ordea, pandemiaren osteko testuingurua aztertuko dute, "bizitzaren esanahi batzuk ulertzeko sakoneko aldaketak" ekarriko baititu. "Hau da, paradigma honek aukera berriak sortuko dituen arren, arriskuak ere baditu, eta izango ditu: krisi egoera honek nabarmenki areagotuko ditu sistema neoliberal, heteropatriarkal, klasista, arrazista eta kolonialak eragiten dituen arrakala sozialak eta burujabetzaren galerak".
2002an sortu zen nazio mailako bilgunea
Euskal Herriko Bilgune Feminista 2002an sortutako nazio mailako erakunde feminista eta abertzalea da, zapalkuntza hirukoitzaren aitortzatik abiatuta errealitatea aztertzen duena. "Zapalkuntza hirukoitza diogunean, klase-zapalkuntzaz, sexu-genero-zapalkuntzaz eta nazio- eta kultura-zapalkuntzaz ari gara. Beraz, askotariko zapalkuntza horien elkarreraginean eta intersekzionalitatean jarduten dugu, Euskal Herri burujabe eta feminista lortzeko helburuarekin".
