Domu Santu Egunean, 275 pertsonako edukiera izango du Arrasateko hilerriak eta klaustro bakoitzean, aldiz, 75 pertsona egon ahal izango dira gehienez. Nitxoen gunean, bestalde, 120 pertsonakoa izango da edukiera eta hezurtegian, familia bakarra –bost pertsona gehienez–.
Modu berean, garraio publiko berezia egongo da hilerriraino, 10:00etatik aurrera, urriaren 31n orduro eta azaroaren 1ean ordu erdiro.
Mugikortasun pribatuari dagokionez, Udaltzaingoak ezarritako neurrien arabera, ezingo da hilerriko sarreran aparkatu, eta ibilgailu partikularrek J.L. Iñarratik igo eta Meatzerrekatik jaitsi beharko dute, Udalak ohartarazi duenez.
Ekintzarik ez domekan
Elizak adierazi du ez dela egingo Santu Guztien Egunean hilerrian egin ohi zen ekintza. "Arau-mugak eta COVID-19ren aurrean Udalak eta Arrasateko Parrokoak gaia aztertu ondoren" hartu dute erabakia.
Arrasateko Udalak "erantzukizunez" jokatzeko eta segurtasun-neurri guztiak betetzeko deia egin die herritarrei: "musukoa nahitaez erabili behar da; gehienez sei pertsonako bilkurak; bizikideak izan ezik; gutxienez 1,5 metroko distantzia pertsonen artean; ordutegi-mugak; segurtasun-neurri orokorrak eta abar". Horrez gain, hilerrira bisitak Domu Santu egun aurreko edo ondorengo egunetan egitea aholkatu du Udalak, "jende pilaketak saihesteko".
