Urtero zabaltzen dizkie ateak Arrasate Atletiko Taldeak atletismoko diziplinetan iniziatu nahi duten gaztetxoei, denboraldia hastearekin batera. Aurten, 80 neska-mutilek eman dute izena, oraingoz, baina, Jon Ormaetxea komunikazio arduradunak esan duenez, "deialdiak irekita jarraitzen du Arrasateatletiko.com webgunean".
Normalean mutil baino neska gehiago apuntatzen direla nabarmendu du Ormaetxeak, nahiz eta 16 urte betetzean balantzaren orekak beste aldera jotzen duen. "Gustatuko litzaiguke adin horretara heltzen diren neskek gurekin entrenatzen eta lehiatzen jarraitzea; horretan saiatzen gara", adierazi du.
Benjamin eta alebin mailetako kirolzaleek era guztietako modalitateak probatzen dituzte hasieran, norberak gustukoen duen diziplina aukeratzeko. 12 urtetik aurrerako gazteek, aldiz, lan-saio espezifikoak egiten dituzte, eta lehiaketetarako prestatzen dira. "2021era begira infantil mailako taldea osatu nahi dugu, Gipuzkoako txapelketetan parte hartu ahal izateko", aipatu du Ormaetxeak.
Proba gehienak, geldi
Martxoan eskolarrak eta Federazioko lehiaketak bertan behera gelditu zirenetik ez da bakar bat ere antolatzeko aukerarik izan. Baliteke 2020a amaitu aurretik markak hobetzeko probaren bat egitea, baina zaila ikuste du Arrasate Atletiko Taldeak. Malen Ruiz de Azua, Eneko Carrascal eta Iñigo Uribarren dira salbuespenak, Espainiako txapelketan lehiatzeko aukera baitaukate atleta arrasatearrek.