Urriaren 24an Liburutegiaren Eguna ospatuko dela eta, saio berezia antolatu du Udal Bibliotekak: etxeko txikienei eskainitako ipuin kontaketa saioa. 3 urtera arteko haurrek eta euren gurasoek ordubeteko tailer laburra jaso ahalko dute, 11:00etan hasita, Udal Bibliotekaren webgunean izena emanda. Emanaldia Saroa Bikandi ipuin kontalariak bideratuko du. Durangarrak lotura estua dauka Kulturaterekin, urtero etortzen da-eta umeei bideratutako egitasmoak dinamizatzera.
Bederatzi urte daramatza Bikandik umeen literaturan murgilduta: "Ama izan nintzenean esparru honetan sakontzen hasi nintzen: ipuinak kontatu, masajeak eman, kantuak abestu... Hizkuntzaren lehen ikasketa prozesua gorputz adierazmenarekin zeharo lotuta dagoela konturatu nintzen". Baliabide ugari jartzen ditu haurren zerbitzura, baina aipagarrienak jolasa, hizkuntza, erritmoa eta errima dira. "Umeek tarte goxoa pasatzen dute saio hauetan, eta gurasoek sorpresa politak eramaten dituzte; badirudi txikiegiak direlako ulermen murritza daukatela, baina gero, uste baino ikasteko gaitasun handiagoa erakusten dute", adierazi du ipuin kontalariak.
Seme-alaba jaioberriak dituzten gurasoek tresna interesgarriak aurkitu ahal dituzte Azalekoipuinak.eus webgunean. Sortzaileen testu, hots eta doinuetan oinarritzen den disko bat entzun daiteke bertan, adibidez. Gisa horretako ikuskizunak antolatzeko jarraibideak ere ematen dira gune birtualean.
Izena eman beharko da aurrez, bibliotekan bertan edo web orrian.
Ekintzak, hilabete osoan
Joan den asteazkenean, Frankenstein berpiztuko balitz ipuin kontaketa bideratu zuen Ana Galarraga zientzialariak Santa Marinako bibliotekan, eta beste horrenbeste egingo du Kulturaten datorren ostegunean, 18:00etan. Izen-ematea zabalik dago, beraz.
Urri osoa barnebildu duen Udal Bibliotekaren egitarau mardulari hilaren 30ean emango zaio itxiera, Mursego musikariaren LAPUR(ari)KETAK izeneko kontzertuarekin. Ekitaldi hori gazte eta helduei zuzenduta dago, eta 18:00etan hasiko da, Kulturaten bertan.
