Antolatzaileek zera diote: "1620ko urriaren 20an Pauko ediktuaren bidez Frantziak anexionatu zuen euskal estatuari gelditzen zitzaion azken zati subiranoa –Nafarroa Beherea– eta gure lurraldeak bere burujabetza galdu zuen. Kultura aldetik aro emankor baten bukaera izan zen".
Gaineratu dute ia zortzi mendez jardun zuela eta nazioarteko mapan Euskal Herria kokatzen zuen Europako estatu baten amaiera zela. "400 urte, harrezgeroztik belaunaldi gutxi pasatu dira, gertuko historia da herri baten ibilbidean, baina gaia ezezaguna da, gure historiako hainbat pasarte bezala".