Libertad Condicional taldeak abesti berria argitaratu du

Mil Vivencias izenarekin ezagutarazi duten taldearen lan berria eta bigarren diskaraen lehen aurrerapen abestia da. Diska berria, Errautsetatik Berpizten izango da eta seguru ez badaude ere, abendu edo urtarrilean kaleratzeko asmoa daukate. Egoerak lagunduz gero, kontzertu baten bidez egingo dute diska berriaren aurkezpena. Abestia Endika Loiola eta Julen Etxebestek grabatu dute eta bidioaren muntaia Luken Ugarteburuk egin du.  

Gabonen inguruan aurkezteko asmoa du Libertad Condicional punk-rock talde gazteak bederatzi abestiz osatutako bigarren diskoa. Aste honetan igo dute sarera lan horren lagin txiki bat: Mil vivencias kantua.

Peru Atxa baxu-jolearen esanetan, Errautsetatik berpizten izenburua "punk-rock taldeen apologia" bat da: "Gaur egungo tendentziak gorabehera, oraindik galdu ez garen froga".

Bizimoduaren jabe diskoan baino "doinu landuagoak" aurkituko ditu entzuleak bigarren horretan. Estiloan, baina, ez da aldaketa nabarmenik igarriko, "mezuak argi eta garbi" helarazten dira eta. Hizkuntza aldetik ere bada nobedaderik; izan ere, euskarazko hitzak dira gehien entzungo direnak, "aurreko lanean gaztelerazkoak nagusitu ziren bezala".

Garai latzak bizi dituzte zirkuitu txikietan mugitzen diren taldeek, baina Libertad Condicionalekoek ez daukate kikiltzeko aitzakiarik. "Hemendik eta abendura bitartean bi bideoklip grabatzeko asmoa daukagu; entseatzen ere bagabiltza, astero ematen diegu errepasoa gure errepertorio propioko hamazazpi abestiei", aitortu du Atxak.

Dena prest estreinaldirako

Oiartzungo Ugaldetxoko eskolako estudioan findu dute musikariek Errautsetatik berpizten LP berria, eta emaitza esku artean daukate jada. Neguaren hasierarekin batera aurkeztu nahi dute, zuzeneko batekin, "eta, ahal bada, zutik". Ziur herriko garra berpizteko gai direla.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.