Zarautzen jokatutako lehen finalerdian elkar oso ondo ezagutzen duten bi talde kantxaratu dira. MU Santurtzi bizkaitarren borrero izan da Euskal Koparen azken edizioetan, baina gaur, ezin izan dute partidua irabazi. Eta, hori, lehen laurdenean arrasatearrak jaun eta jabe izan direla. Jokoa menderatu dute eta zazpi puntuko abantaila atera: 20-13.
Bada, bigarren tartean, bizkaitarrek abantaila txikitzea lortu dute, bost puntutan utzita: 37-32. Atsedenaldiaren ostean, hirugarren laurdenean abantaila mantentzea lortu dute Ointxe!-koek. Hori horrela, azken tartearen azken minutuetan erabaki da lehia. Partidua bukatzeko hiru minutu geratzen zirenean hamar puntu aurretik ipini da Santurtzi (66-56) eta lehia erabakita utzi du. "Aukeratako bat zen, eta galdu egin dugu. Baina, denboraldia hasi besterik ez da egin. Liga hasteko gogotsu gaude, ondo entrenatzen eta lehiatzen hasteko prest. Oraindik, kontzeptu batzuk hobetu behar ditugu erasoan zein defentsan, baina, lan ona egiten dihardugu", esan du Ogarak.