Dokumentalean, lau emakume etorkinek zaintza lanetan jasandako zapalkuntzak salatzen dituzte. Bakoitzak beretik, gogoeta bat eragin nahi dio ikusleari galdera bat eginez. "Euskal Herriko atari bakoitzean dago zaintza lanetan esklabo diharduen emakume etorkin bat", azaldu dute.
15 minutuko film laburra Maitane Subijana Zendoiak zuzendu du eta Luz Agirre, Jessica Guzman eta Mina dira protagonistak –gaztelaniaz da–. Emakume Txokotik azaldu dutenez, prekarietateak emakume eta etorkin aurpegia du. "Egunez egunekoa den errealitate horrekin egiten dute lan Malen Etxean. Malen Etxea emakume etorkinen ahalduntzean ari da lanean, bereziki diskriminazioa, esplotazioa eta abusua pairatzen dituzten langileen promozioan. Lan eskubiderik eta eskubide politikorik ez duen gutxiengo baten kontura elikatzen den aurrerabide bat nahi dugu?", diote.
Halaber, zaintza lanen garrantzia "inoiz baino modu agerikoagoan" mahai gainean dagoen honetan, "ezinbesteko" hausnarketa da Malen Etxeako kideek egiten dutena, Emakumeen Txokoko arduradunen arabera.