Manifestazioaren amaieran Arkauzek GOIENAri adierazi dioenez, okerrena pentsatu zuen Gasteizen lanean ari zela Guardia Zibila bere bila zetorrela ikusterakoan: "Harridura eta sorpresa handiz jaso nuen atxiloketa agindua. Okerrena pentsatu nuen eskolan lanean ari nintzela Guardia Zibilaren plaka ikusi nuenean, txipa aldatu behar izan nuen. Miaketa luze joan zen hainbat orduz eta handik Oñatira eraman ninduten; Oñatitik Donostiara, Intxaurrondora, eta handik Madrilera".
Hirugarren egunaz jarraian egin duten kale agerraldiaren amaieran honako mezu hau zabaldu nahi izan du Arkauzek: "Eskerrik asko denoi azken egun hauetan niri eta familiari helarazitako babesagatik. Albiste pozgarria da Ekhiñe, Imanol eta hirurok Euskal Herrira bueltan egotea, baina argi geratu dadila baldintzapean gaudela aske, epaiketa baten zain. Ikusiko dugu zer gertatzen den. Batzuk bakearen alde borrokan ari garen bitartean argi ikusten da beste batzuk bakea urrun dutela eta katramilatuta daudela Euskal Herriaren aurkako erasoetan. Kalean ikusiko gara... aurrera bolie!".
