"Koltxonetak apurtuta daude, euskarri asko solte daude, paretak oso zikin daude eta aire-erauzgailuak ez du funtzionatzen". Hauek dira, besteak beste, erabiltzaileek dituzten kexak. Egoitek enpresa arduratzen da instalazio honen mantenduaz eta Uarkape itxita egon denean, enpresa instalazioak garbitzeaz arduratu da, baina gutxirako bailo izan du. Irailaren 7an zabaldu zituzten Uarkapeko instalazioak eta geroztik ez dute ezer garbitu. Pieza guztiak askatu eta garbitu zituzten baina ez dituzte 20 egun ere iraun, izan ere pieza asko solte daude berriz ere.
Aire-erauzgailu berri baten beharraz ere mintzo izan dira erabiltzaileak. "Eskaladan magnesioa erabiltzen dugu eta honek giroa kondentsatzen du. Aire-erauzgailu berri bat behar dugu horretarako, bestela ezin da magnesio hori kanporatu". Adin ugariko jendeak erabiltzen ditu eskaladarako instalazioak, asteburuetan familia ugari joaten baitira, baina Aretxabaletan eskalada-murrua eraiki zutenetik, erabiltzaile asko bertara joaten dira egoera askoz hobean dagoelako. "Duela urte batzuk eskalada-murrua autogestionatua zen eta askoz garbiago zegoen. Orain aldiz, udal zerbitzuengatik ordaindu behar dugu eta egoera okerragoan dago"