1991az geroztik kartzelan dagoen Josu Arkauz euskal preso arrasatearra Murtziako espetxetik Valladolidera gerturatuko dute, Barne Ministerioaren baitan dagoen Espainiako Espetxe Instituzioen Idazkaritza Nagusiak jakinarazi duenez.
Arkauzen senide eta ingurukoei baina, oraindik ez diete ezer ere esan eta ez dakite leku-aldatzea noiz gauzatuko den. Gaineratu dute, era berean, euskal preso arrasatearraren moduluan konfinatuta daudela koronabirus kasu bat tarteko.
Hiru laurdenak beteta
Frantzian atxilotu zuten Josu Arkauz orain 29 urte, eta han sei urtez preso egon ostean, 1997an Espainiaratu zuten. 30 urteko espetxe zigorra ezarri zioten, eta ondorioz, 2015ean bete zituen zigorraren hiru laurdenak.
Juan Carlos Herrador, Lierni Armendariz, Unai Fano eta Gorka Loran euskal presoak gerturatuko dituztela ere jakinarazi dute Espetxe Instituzioen Idazkaritza Nagusitik.