Arrasateko gaztetxeak konfinamendu osteko lehen kontzertu akustikoa antolatu zuen joan den domekarako, eta segurtasun distantziak errespetatuta jarri zituzten 80 eserlekuak bete egin zituzten zaleek. Musukoa ere derrigorrezkoa izan zen, eta, gaztetxeko kide Inesa Ugalderen esanetan, ikus-entzuleek oso ondo erantzun zuten. "Egoera arraroa izan zen guztiontzat, baina ondo errespetatu zituzten neurri guztiak. Musukoak jantzita eduki zituzten une oro eta zigarro-puntak ere ez zituzten lurrera bota", adierazi du.
Ekiñe Casado eta Tabu bikotea aritu ziren oholtza gainean. Azken horientzat bigarren kontzertua izan zen domekakoa.
Ugaldek azaldu duenez, nabaritu zen herritarrak zuzeneko kontzertuen gose zirela, eta udara begira beste emanaldiren bat antolatzeko asmotan direla azaldu du. "Hala ere, oraindik ez daukagu ezer lotuta".