Erakundeen arteko koordinazioari buruz, adierazi dute, "batez ere, Jaurlaritzaren Osasun Sailaren eta herrietako Gizarte Zerbitzuen Sailen artean" eman behar dela, baina baita "sistema judizialarekin, segurtasun indarrekin, hezkuntza sistemarekin eta lanbide heziketarekin".
"Drogekiko adikzioen eraginez euren borondatea anulatuta duten adinez nagusikoak derrigortu egin beharko lituzkete desintoxikazio eta terapia zentroetan sartzera; gai hau serioki landu beharko lukete. Horrez gain, arazo hauek dituzten familiei koordinatzaile edo arduradun batzuk egokitzea beharrezkoa da; hala, familiak ez lirateke erakunde batetik bestera laguntza eske arituko".
Patologia dualari aurre egiteko bi proposamen egin dituzte: "Gai honetan adituak diren profesionalak behar ditugu, presazko izaeraz; gaixotasun hau garaiz diagnostikatzeko, eta gaixoen beharrei erantzuteko. Era berean, gaixotasun honi aurre egiteko zentro espezializatu gehiago behar ditugu Euskal Herrian".