EH Bildu nagusitu da Arrasaten botoen ia %40arekin

EAJk baino 352 bozka gehiago lortu ditu EH Bilduk Arrasaten. 2016ko hauteskundeetan jeltzaleak izan ziren indar bozkatuena eta oraingoan EH Bilduk eskuratu du botoen gehiengoa. Abstentzioak nabarmen egin du gora (ia %45).

EH Bildu gailendu da 2020ko hauteskundeetan Arrasaten, botoen %39,32arekin (2016an %32,65a lortu zuen). Aurreko hauteskundeetan, 2016an, EAJ izan zen indar bozkatuena botoen %33,77arekin, eta oraingoan EH Bilduk eskuratu ditu boto gehien, EAJk baino 352 boto gehiago hain zuzen ere. Alderdi jeltzaleak, hala ere, ez du portzentajeetan behera egin, botoen %35,61a lortu du-eta, 2016an baino bi puntu gehiago.

Hirugarren indar bozkatuena PSE-EE izan da botoen %11,53arekin, Elkarrekin-Podemosen aurretik. Sozialistek apur bat gora egin dute, 2016ko hauteskundeetan botoen %10,71 jaso baitzuten Arrasaten. Elkarrekin-Podemosek behera egin du nabarmen, aurreko hauteskundeetan botoen %14,98 jaso baitzuen eta oraingoan %7,62a jaso baitu.

PP eta Ciudadanosek osaturiko koalizioak 245 bozka jaso ditu. Aurreko hauteskundeetan PPk 480 jaso zituen, eta Ciudadanosek 121. Beraz, nabarmen behera egin dute, 2016ko hauteskundeekin alderatuta. EQUO-Berdeak alderdiak 99 bozka jaso ditu eta Voxek 68.

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.