Juan Arzamendi Musika Etxeko lanak geldi daude urtea hasi zenetik. Lurgoien enpresak lanak bertan behera utzi zituen eraikin osoko lanen %42 eginda zegoenean. Udalak enpresa horrekin zuen kontratua eteteko bidea hasi zuen apirileko osoko bilkuran, eta ostean, lehiaketa publikoa egingo dute falta diren lanak berriz esleitzeko. Hala, enpresa berriari lanak egokitu arte, eraikina babesteko beharra ikusi du Udalak, eta lehiaketa publikoa deitu dute, eraikina babesteko estalki bat jartzeko.
Pleguak, onartuta
Maiatzaren 21ean, tokiko gobernu batzarrean ontzat eman zituzten pleguak. Besteak beste, sei asteko epea ezartzen da estaltze-lanak egiteko, eta 103.429 euroko aurrekontua estimatzen dute –BEZa barne–. Gastu gehigarri hau jada 2020ko aurrekontu barruan dago. Apirileko osoko bilkuran 921.570 euroko kreditu gehigarriak onartu zituen udalbatzak, non 2020 hasieran onartutako gastuen atalean 100.000 euro zeuden lan hauetarako. Orain, kontu sail hori 4.000 euro handituko da.
