Ikasleen interesak defendatuko dituen proposamenak egitea helburu, hiru neurri exijitu nahi dituzte. Alde batetik, beharrezkoa den edukia bakarrik ematea eskatu dute: DBHko eta Batxilergoko lehenengo mailakoen kasuan "garrantzitsuena dena" eta bigarren mailakoentzat "selektibitatean sartuko dena".
Bestetik, ikasle-taldearen ustez, ebaluazio irizpideak egoerara egokitu behar dituzte zuzendaritza taldekoek eta "malgutasun handiagoz" jokatzeko eskatu dute. Bukatzeko, lan-zama murrizteko eskaera ere jaso dute mezuan: "Lotsagarria iruditzen zaigu egoera honetan dugun lan karga handia".
"Argi daukagu une honetan hezkuntza sistemak ez dituela ikasleon interesak defendatzen eta ikasleon intereseko hezkuntza lortzeko forma bakarra antolakuntza eta borroka dela", gehitu dute, eta ezinbestekotzat jo dute negoziazio mahaia sortzea.
