Ibai-arte merkatari elkarteak antolatuta, gaur eta bihar egingo da udazken eta neguko stock azoka Arrasaten. Gaur arratsaldean eta bihar egun osoan zehar, herriko kaleetan zehar saltokiak kalera aterako dira. Oraingoan, hogeita hamar saltoki irtengo dira euren establezimendu aurrera edo komertzio-guneetara udazken- eta negu denboraldiko produktuak beherapenekin eskaintzera; denda bakoitzak erabakiko du beherapenen portzentajea. Astebururako, Merkemerkauaz gain, umeentzako beste ekintza batzuk ere antolatu ditu Ibai-artek.
Egitarau zabala
Gaur, arratsaldeko seietan, Kids&Us-ek antolatuta, Ibai-arteren eta Udalaren laguntzarekin, Gina Ginger and Charlie Chives antzezlana eta Kia eta bere Ukelelearen umeentzako kontzertua egongo da Kulturaten. 3 eta 10 urte arteko umeentzako da eta sarrera doakoa da.Bihar, 12:30ean, Kantu Kolorek eskainitako ikuskizuna egongo da Herriko Plazan. Honolulu musikala eskainiko dute, koreografia eta dantza berriekin, eta adin guztietako haurrak dantzan jarriko ditu. Horretaz gain, Kantu Koloreren kantekin, haurrek hainbat ikasgai landuko dituzte: zuhaitzak, koloreak, hilabeteak, animaliak... ondo pasatzen ari diren bitartean. Eta arratsaldeko sei eta erdietan, Maiatzaren Bata plazatik abiatuta, argiz apainduriko lau metroko elefantea eta beste lau elefante txiki musikaz lagunduta Herriko Plazara abiatuko dira, herriko kaleak girotzeko. Gaur eta bihar bitartean, dendetako beherapenez eta Ibai-artek antolatutako ekintzez gozatzeko aukera egongo da.