Zapatuan jokatu zuten Bartzelonan Espainiako Jiu-Jitsuko txapelketa, Newaza modalitatean, eta Euskal selekzioa ordezkatuz ABAE taldeko (Arrasate Borroka Arte Eskola) Julio Gallegok zuzendutako taldeak sekulako lana egin zuen. Izan ere, ordezkari euskaldunek orotara urrezko lau domina eta zilarrezko beste hiru eskuratu zituen.
Borrokalariak, bikain
Nabarmentzeko moduko lana egin zuten borrokalariek. Urrea jantzi zuten Naroa Garciak, Javi Massak, Cristian Richard-ek eta Imanol Lamelak. Eta, zilarrezkoa irabazi zuten Nekane Muguruzak, Maria Merinok eta Joquad Karbatek. "Badirudi ABAE barruan borroka arte ezberdinetako taldeek batera egiten ditugun entrenamendu saioak emaitza onak ematen dabiltzala", adierazi dute taldetik. Izan ere, Aikido taldekoek, Kenpokoek eta Judokoek osatzen dute ABAE: "Batuketak indartsuago egin gaitu". Jose Manuel Matas, Iker Letona eta Julio Gallego dira hiru borroka arteetako arduradunak.
