Hasi aurretik ere jakinekoa zen Anaitasunaren kontrako lehia oso zaila izango zela. Sailkapenaren bigarren lekuan daude azkoitiarrak, eta hori kasualitatea ez dela erakutsi zuten Mojategin. Mondra hobeto jokatzen zebilenean, Anaitasunaren lehen gola heldu zen. Atzeko lerroan egindako hutsa aprobetxatu zuen Mikel Arzallusek gola sartzeko, 38. minutuan. Kolpe gogorra etxekoendako, eta lasaitasuna kanpotarrendako. Lehen zatian ez zuen askoz gehiagorako eman.
Bigarren zatian, Anaitasuna kontrolatu zuen baloia hobeto. Irizpide askoz gehiagorekin jokatu zuen, Mondrari aukera gutxi utzita. "Baloia lasaitasun eta zehaztasun handiagoarekin mugitzea falta zaigu. Hori, askoz hobeto egin du Anaitasunak", esan zuen Olaizolak.
Dena den, arrasatearrek azken ahalegina egin zuten azkoitiarrak jokalari bat gutxiagoarekin geratu zirenean. Hamar minutu geratzen ziren lehia bukatzeko, eta lerroak aurreratuta, berdinketaren bila joan ziren. Baina, kontraerasoan, bigarren sartu zuen Anaitasunak, Julen Iriarteren bidez, eta partidua erabakita geratu zen, 88. minutuan.