Musakolako kiroldegiko markagailuak berdinduta (5-5) bukatu du gaurkoan Mondrate eta Soloarte areto futbol taldeen arteko lehian. Jonatan Raso Mondrate taldeko jokalariak azaldu duenez, lehen zatian taldeari "kosta" egin zaio martxa hartzea, baina gutxinaka "partiduari buelta emateko gai" izan dira, nahiz eta azken minutuan Soloartek berdinketa lortu duen: "Azken unera arte lehia oso estua izan da, partidua amaitzeko 15 segundu falta zirela egin du Soloartek bosgarren gola, partidua berdindu duen gola hain zuzen".
Euskal Ligan lehiatzen diren hamabost taldeetako bat da Mondrate, "maila altuko taldeak" dituen liga eta hain zuzen, aurkariaz galdetuta, "ona" bezala definitu du Jonatan Raso jokalariak talde bizkaitarra: "Oso ondo lehiatu dira, maila ona erakutsi dute eta azken unera arte hor ibili gara". Datorren jardunaldian Hegalariak taldea izango du aurkari areto futbol talde arrasatearrak.
Ingou Aloñaren garaipena
Ingou Aloñak Egintza taldearen bisita jaso zuen atzo arratsaldean Oñatiko Zubikoa kiroldegian. Gauzak horrela, oñatiarrek 3-0 irabazi zuten partidua eta sailkapeneko lehen postuetan egoten jarraitzen dute.
