Arrasateko Udaleko langileek "borroka dinamika" bat jarri dute martxan, udal gobernuarekin euren lan baldintzak negoziatzeko. "Enpresa Komitetik Negoziazio Mahaira eraman ditugun proposamen zehatzen eta argudioen aurrean, gobernuaren partetik ezetza baino ez dugu jaso; negoziazio mahaiak deitzen dituzte negoziatzeko inolako asmorik eduki gabe, ez dutelako negoziazio marko hau aintzat hartzen", diote.
Hori dela eta, elkarretaratzea egin dute asteon, udaletxean, euskaltegian eta gizarte zerbitzuetan, eta beste hiru ere badituzte aurreikusita: datorren eguaztenean, urtarrilaren 8an eta 15ean –guztietan 12:00etan–. Horrez gain, abenduko osoko bilkuran ere egon ziren protesta egiten eta urtarrilekora joateko asmoa ere badute, "gauzak ez badira aldatzen". Azkenik, euren lan lekuetan kartelak jarrita dituzte, egoera salatzeko.
