Aldundiko eta Udaleko ordezkariak institutuko gazteekin elkartu dira

Mirari Altube Arrese 2019ko urr. 28a, 08:07

Gipuzkoako Foru Aldundia 17 eta 23 urte bitarteko gazteak politikara gerturatzeko saioak egiten hasi da Europar Batasunaren Erasmus+ programaren barruan garatzen dabilen Youth Empowerment ekimenaren bitartez. Hala, Gobernantza diputatu eta foru bozeramaile den Eider Mendoza Arrasateko institutuko gazteekin elkartu zen egubakoitzean.

"Ekimenaren helburua gazteriaren partaidetza sustatzea da, eskubide osozko herritarrak bezala jokatu dezaten. Aldi berean, politikari eta erabaki hartzearen arduradunekin interakzioa, harremana eta ekimenak partekatzea sustatu nahi da", azaldu du Eider Mendoza diputatuak.

Institutuko lehen eta bigarren Batxilergoko 40 ikasle ingururekin elkartu zen, eta Mendozarekin batera izan ziren Maria Ubarretxena, Arrasateko alkatea; Anuska Ezkurra, alkateordea; eta Joseba Muxika, Herritarren Partaidetzarako foru zuzendaria. "Udalak eta Aldundiak herritarrengandik gertuen gauden erakundeak gara, baina hala ere herritarren gehiengoak ez daki zein diren gure eskumen zehatzak edota egiten dugun lanak zertan datzan", adierazi zuen Mendozak. Landutako gaien artean izan ziren klima aldaketa, gazteen emantzipazioa eta arduradun politikoak politikara nola iritsi ziren.

Eider Mendoza ikasleen aurrean azalpenak ematen.

Bukaeran, agiri bat osatu zuten jorratutako gaiekin eta ordezkaritza bat hautatu ere bai. Horiek, beste hamar bat ikastetxetako ordezkariekin batera, bigarren jardunaldi batean hartuko dute parte; hori, Gipuzkoako Batzar Nagusietan egingo da, eta han, saioetan jasotako ondorioak ordezkari politikoei helaraziko dizkiete.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak