Udal ordezkariak "harrituta" geratu dira Robedaren bizkortasunarekin, "lau egunen kabuan" amaitu duelako 30 metroko horma irudia. "Esku-hartze honek, Arrasateko Udalak azken urteotan herriko hainbat gune muralen bidez egokitzen egindako ibilbidearekin bat egiten du" gaineratu du Ubarretxena alkateak.
Artista argentinarrak, Bergarako Trenbidearen Museoa, Gasteizko Ataria Zentroa –inguruko flora eta fauna ezagutzeko erreferentziazko zentroa– eta, batez ere, Udala auzoko Natur Zentroa bisitatu ditu 30 metrotik gorako mural hori egiteko. Izan ere, azken honetan eman dio ostatu Arrasateko Udalak artistari bere egonaldian. "Zoragarria izan da Udalaitzen mendi-hegaletatik egunsentia ikustea: eguna, eguzkia sortzen ikustea edota euriari entzutea" adierazi du Robedak.