Bihar, 50 urte beteko dira Arrasaten otxote txapelketa egin zutenetik, eta efemeridea gogoratzeko hiru talde gonbidatu ditu herriko Txorbela otxoteak: Baionako Enara, Portugaleteko Danok Bat eta Errenteriako Karnaba. "Portugaletekoek irabazi zuten, eta bihar, zapatua, orduan abestu zituzten bi kantu eskainiko dituzte; eta Karnaba taldeko oinordekoak ere etorriko dira. Era berean, nesken otxoteak ekartzeko ahalegina egin dugu, eta hala gonbidatu ditugu Baionakoak", diote antolatzaileek.
San Frantziskon eta kalean
12:00etatik 13:00etara kontzertua egingo dute San Frantzisko elizan, eta ondoren, kalean jarraituko dute abesten. "Bakoitzak bina kantu abestuko ditu, eta bukatzeko, elkarrekin, Txanton Piperri operako Euskal Herriko. Ondoren, 14:30ak arte, Alkartu elkartean bazkaldu aurretik, kalean abesten ibiliko gara".