Txapelketako lehenengo bi partiduak irabazita, gogotsu hasi du partidua Ford Mugarrik. Aurrean, Corazonistas taldea. Talde indartsua. Esperientziaduna, eta gauzak ondo egiten badu, sailkapenaren goiko lekuetan egongo dena. Bada, hori dana kontuan hartuta, arrasatearren estu hartu du Gasteizko taldea. Markagailuan agintzen eta jokoan ere bai. Lehen zatiko azken minutuetara arte. Orduan, bi jokalari egotzi ditu epaileak, eta hainbat minutuz, lau jokalarirekin egon da etxeko taldea. Abantaila hori baliatuta, aurretik ipini da Corazonistas, aldageletarako bidea hartu aurretik: 14-15.
Bigarren zatia oso bestelakoa izan da. Ford Mugarrik indarra galdu du. Erasoan arazo handiak izan dituzte jokaldi garbiak egiteko. Bereziki, gasteiztarrek defentsa aldatu dutenean. Jokalari bat aurreratu dute, eta horrekin, arrasatearren aukera guztiak zapuztu dituzte. "Abantaila hartzen duenean, talde indartsua da. Badaki aldeko markagailuarekin jokatzen, eta gaur erakutsi dute. Galdu egin dugu, bai; baina iaz ez genuen lehen garaipena lortu seigarren jardunaldira arte. Aurten, hirutik bi irabazi ditugu", azaldu du Herrerok.