Esperimentu moduan hasi zen Kooltur Ekintzak ekimena eguenetan kontzertuak antolatzen orain dela hamar urte, eta, harrezkero, Arrasateko zein Debagoieneko beste herrietako musikazaleentzako asteroko hitzordu finko bilakatu da.
Hamargarrena, bihar hasita
Hamargarren aldia abiatzear da, eta antolatzaileek hau diote: "Hori posible egin dute jende askoren lanak eta ekimenari babesa eman dioten guztiek". Hori horrela, hamargarrenean ere orain arteko bide beretik jarraituko dutela gaineratu dute; hortaz, jaiegun edo jai bezperetan izan ezik, eguenero izango dira kontzertuak, 22:00etan hasita, eta bost euroko sarrera ordainduta.
Hasteko, Izaki Gardenak
Martxoan Amaia antzokian izan zen Jon Basagurenek gidatzen duen Gasteizko taldea kaleratu berri zuen Dena Oskol lana aurkezten, eta oraindik ere hala jarraitzen dute, "arrakastaz" kantu berriak eta bilduma zaharragoetakoak ere zuzenean eskaintzen. "Euren sasoi onenean daude sekulako kontzertuak ematen", dio Kooltur Ekintzak taldeko Iker Barandiaranek, eta zera gaineratu du: "Pop-rock dotore-dotorea egiten dute, americana printzak ere badituena. Urteetako ibilbidearen ondoren kantu arrakastatsu eta borobilekin beti, behingoz lortu dute publiko handiaren onespena".
Bateria eta gitarra, hurrengoan
Kooltur Ostegunak ekimena barrutik ezagutzen duen –orain dela hiru urte ere gonbidatu zituzten– Niña Coyote (Ursula Strong) eta Chico Tornadok (Koldo Soret) hartuko dute urriaren 10ean gaztetxeko agertokian lekukoa. "Rock gogorra, stonerra psicodelia ukituekin egiten dute. Indarra, sentimendua, iluntasuna eta, batez ere, intentsitatea".
Atzerritik etorritakoak ere bai
Euskal Herrian birak egiten dituzten taldeei ere tokia egiten diete; horren erakusle dira urria borobilduko duten Motosierra eta Volcanics. "Uruguaiko punk-rock makarra eta gogorraren aitzindari da Motosierra; eta Australiatik etorriko diren The Volcanicsek ere ibilbide luzea du high-energy indartsua egiten. Luxua gurera ekarri ahal izatea".
