Giza eskubideak. Askatasuna. Etorkizuna. Herrian lelopean egin zuten atzoko manifestazioa. Hasieran, auzipetuetako bik, Ibon Meñikak eta Amaia Izkok, bihar, astelehena, Madrilera joan behar duten auzipetu guztien izenean egin zuten berba. Euren kezkak plazaratu zituzten. Akusazioak 600 urtetik gorako espetxe-zigorra eskatzen du.
La Casilla plazatik abiatu zen manifestazioan askotariko eragilek, erakundeetako ordezkarik eta bazter guztietatik joandako herritarrek parte hartu zuten.
Herrikideen babesa
Arrasatetik bi autobus eta Aretxabaletatik beste bat joan ziren atzoko manifestaziora. Guztiek zuten buruan Ekain Zubizarreta. "Epaiketa honek ez du zentzurik. Hasi ere ez litzakete hasi beharko", esan zuen Eneko Barberenak. Azken egunetan Arrasateko kaleetan eta sare sozialetan babes sendoa eman zaie 47 auzipetuei. "Kaleetan egotea oso inportantea da gure mezua zabaltzeko, eta elkartasuna eta babesa adierazteko", gaineratu du. Ekain bera zer moduz dagoen galdetuta, zera esan du: "Urduri dago, normala den moduan. Baina, indartsu ere badago. Ez da egoera goxoa bihartik aurrera bizi behar dutena, baina herritarren babesa sentitzen dute, eta eskertzen dute".
Elkarretaratzea eta greba deialdia
Gaur, domeka, abiatuko dira auziperatuak Madril aldera. Bihar, epaiketaren lehen egunean, elkarretaratzea egingo dute Arrasateko Herriko Plazan, 19:00etan. Era berean, Ikasle Abertzaleak greba eguna deitu du Arrasateko ikastetxeetako Batxilergoko ikasleen artean.
