Bi talde horiek dagoeneko buru-belarri dabiltza ligan. Eibarrek kolpe gogorra jaso du asteburuan, Atleticori azken minutuetara arte ondo estutu eta gero bazirudielako Mendilibarren gizonak partidua irabazteko gauza izango zirela. Baina, madrildarrek markagailua irauli eta ligako hirugarren garaipena eskuratu dute (3-2). Hala, orain arte puntu bakarra eskuratuta, Eibar atzealdeko postuetan dago.
Eta Bigarren mailan Mirandes ez dago hobeto sailkapenean. Athleticeko jokalari ohi Andoni Iraolaren taldeak ere hiru partidu jokatu ditu ligan; lehen jardunaldian Rayoren kontra berdinketa ona eskuratu eta gero, azken bi asteetan galdu egin dute Cadizen eta Numantziaren kontra. Bada, bi talde horien arteko lagunartekoa antolatu dute eguaztenerako, irailak 4 (18:30 Atxabalpe).