Polemika piztu zuen komentario horren aurrean, antolakuntzakoek mea culpa batekin erantzun zuten sare sozialetan, eta GOIENAri adierazi diote erretiratuei bi aldiz eskatu zietela barkamena momentuan bertan. "Hainbat akats egin genituen, eta ez daukagu arazorik hala izan zela aitortzeko. Ez genuen mantelik jarri, eta ogia eta zapiak berandu heldu ziren. Baina mahairik mahai joan ginen barkamena eskatzera, eta opari banaketa egin ostean ere berriz eskatu genuen barkamena. Erretiratu batzuek esan ziguten bazkaria ez zela ona izan, baina bazkariko beste osagaiekin –txaranga eta opari banaketa– gustura zeudela".
Aipatu beharra dago, catering enpresa bat kontratatu beharrean jai batzordekoak aritu zirela bazkaria antolatzen. "Bazkaria auzoko jatetxe batean enkargatu genuen, eta bestea guztia gure kabuz zen: mahaiak, aulkiak, zapiak, ogia, janaria zerbitzatzea..."
Bazkariari buruzko kexa jarri zuen herritarrak ere aipatzen zuen antolakuntzako kideak "lo geratu zirela alkatetzako giltzak gainean edukita". Horri buruz zera adierazi dute antolatzaileek: "Domeka goizean kideetako bat lokartu egin zen eta txarangako kideek ordubete itxaron behar izan zuten alkatetzara sartu ahal izateko. Horrelako gauzak gertatu egin daitezke, eta momentuan barkamenak eskatu genizkien kaltetuei".
Jasotako babes mezuei buruz zera adierazi dute antolakuntzakoek: "Ikaragarria izan da zenbat jendek eman digun euren babesa. Ez sare sozialetan bakarrik, aurrez aurre jende askok eskertu baitigu egindako lana".
Jaiak, "espero baino hobeto"
Orokorrean, "jaiak espero baino hobeto" atera direla adierazi dute antolatzaileek, batez ere, "Makatzenako jendea asko inplikatzea" lortu dutelako. "Ahalegindu gara jaiak Makatzenara ere eramaten, eta, adibidez, bertako frontoian jarri ditugu haurrentzako puzgarriak eta auzo-bazkaria. Makatzenako lagun asko gerturatu dira festetako ekintzetara, eta horietako askoren laguntza jaso dugu. Auzo bazkari ostean, adibidez, gauzak batzeko orduan jende ugari aritu zen guri laguntzen, eta hori eskertzekoa da, benetan".
