Ekain Zubizarreta eta beste 46 lagunen aurkako epaiketa irailaren 16an hasiko da, eta azaroaren 18ra arte luzatu daitekeela aurreikusten dute. Maila nazionalean 8.200 sinadura batu dituzte, eta irailaren 14an manifestazio nazionala iragarri dute –Arrasatetik autobusak jarriko dira–. Horrez gain, auzipetuen jatorrizko herrietan plataformak antolatzen dabiltza –2.000 lagunetik gora hartu dute parte– atxikimenduak eta babes ekonomikoa lortze aldera, eta asteazkenean horietako lehena egin zuten Arrasaten.
"Atzokoa ideia zaparrada bat izan zen; bai gaiari buruzko atxikimenduak nola lortu ikusteko, baita gaiari ikusgarritasuna emateko, eta baita babes ekonomikoa lortzeko" azaldu du Eneko Barberenak. "Udara begira argazki lehiaketa bat egitea, Aurtengo LKRTSN eguna honekin karakterizatzea, uztaileko auzo-jaietan gaiari ikusgarritasuna ematea izan ziren ideietako batzuk".
Uztailaren 23an beste bilera bat egingo dute –18:00etan Kulturaten–, aipatutako ideiak lan-taldeka jorratzeko.