Elortzaren argazki irabazleak, ondo baino hobeto islatzen du izenburuak dioena: kaosa. Zezenak hesia saltatu ostean, lasai-lasai zeuden ikusleak zezen plazara sartzen diren unea harrapatu zuen kamerarekin. "Jada adin bat daukagunok, seme-alaben baitan bizi ditugu sanjuanak. Goizean zezen-plazara joan ginen, eta kamera alboan eramatea pentsatu nuen. Zorte pixka batekin, une berezi hori hartzea lortu nuen".
Bitxikeria gisa, zezen plazako ikusleetako bati telefono mugikorra lurrera jausten zaio. Bitxiena da, mugikorra zeharka dagoela, guztiz lurrera jausi gabe. Elortzak 300 euroko diru-saria eta garaikurra jaso zituen.
Bigarren saria Ander Etxeberriaren Dantzan izeneko argazkiarentzat izan zen. Mugimendua eta kolore biziak ditu, eta honek ere aitortu zuen seme-alabak edukitzea lagungarria dela, sanjuanetan argazki onak ateratzeko orduan. Etxeberriak 150 euro eta garaikurra jaso zituen argazki eder horren truke.
Hirugarren saria Aritz Gordoren Vacile argazkiarentzat izan zen. Olarte kalean aterako argazkian, gaztetxo batzuk bizkarrez dagoen buruhandi bat xaxatzen ageri dira.
Argazki originalena, aldiz, Mikel Maidaganek irabazi zuen. Saltzaileen postutxoetan aterako argazkia da, bertako oihalen forma geometrikoak bikain baliatzen dituena. Bai Gordok eta bai Maidaganek 100 euroko diru saria eta garaikurrak jaso zituzten.
Bosgarren aldia
Aurtengoa lehiaketan 50 argazki aurkeztu dira eta 27 argazkilarik hartu dute parte. Argazki guztiak ikusteko, egin klik hemen.