Ibai-Artek, Arrasateko Merkatari eta Zerbitzu Elkarteak, Udalarekin elkarlanean lehen Arrasate Blues jaialdia antolatu du uztailerako. Hamahiru talderen kontzertuak izango dira Arrasateko zortzi tabernatan: Kajoi, Taupa, 1990 Gastroteka, Monte, Ezkiña, Tan-taka, Aterpe eta Itzala. Herriko Plazan eta Euskal Herria plazan ere izango dira emanaldiak. Gainera, kontzertuetako egunetan tabernetan edariak doan kontsumitzeko 2.000 txarteletik gora banatuko dituzte Ibai-Arteko kide diren komertzioen bezeroen artean. "Kontzertuak baino bi aste lehenago hasiko gara txartelak banatzen bezeroen artean, eta kontzertuko egunetan ardoa, zerbeza edo bermuta edateko balioko dute", azaldu du Jon Apraizek, Ibai-Arte elkarteko presidenteak.
Apraizen esanetan, talde gehienak Arrasaterekin lotura dutenak dira: "The Allnighters taldea da kartel-burua eta bertako saxofoijolea, esaterako, arrasatearra da, Zigor Martinez. Jose Barrio ere Arrasateko Musika Eskolako irakaslea izana da, eta egun, Nafarroako Kontserbatorioko irakaslea. Bestalde, aipatzekoa da, baita ere, Leikek euskaraz abestuko duela".
Argazki lehiaketa eta murala
Apraizek jakinarazi du jaialdiak irauten duen bitartean argazki lehiaketa bat egingo dutela eta egun gutxi barru jakinaraziko dituztela xehetasunak. "Bestalde, kontzertu batzuetan Arrasateko artista batzuek mural bat margotuko dute, adierazpen librean", gaineratu du Apraizek.
Apar jaia haurrentzat
Blues jaialdiaz gain, haurrentzat apar jaia ere antolatu du Ibai-Arte elkarteak: "Uztailaren 20an, Biteri plazan apar jaia ospatuko dugu, Kids&Us ingeles akademiaren eskutik".