Mondrak dagoeneko egin du datorren denboraldira begirako lehen fitxaketa: Josu Arizmendiarrieta arrasatearra (1993). Txiki-txikitatik UDAn aritu izan da, baina azpimarratu du azken bi urteetan ez duela futbolaz "batere disfrutatu".
Hori dela eta, "aire aldaketa" behar zuen, eta etxera itzultzeko aukera suertatu zaio. "Mondrako zuzendaritzan familiar bat daukat, eta kuadrillako bi ere badaude lehen taldean. Eurek animatu naute", azaldu du. Taldera ondo egokituko dela uste du. "Izan ere, gehienak ezagutzen ditut. Orain arte aurkari izan direnak taldekide izango dira aurrerantzean", dio.
Entrenatzailea, gustura
Jorge Davila entrenatzaileak begi onez ikusten du taldearen fitxaketa berria. Izan ere, profil honetako jokalari baten bila zebilen kluba. "Kategoria honetarako aurrelari egokia da, langilea eta goleatzailea. Golak sartzeaz gain, lana eta gogoa jartzen badu, daukan guztia ematen badu, gu pozik".
Udako campusa
Bestalde, astelehenean hasi eta lau astez udako campusa egingo du Mondrak Mojategin. Izena emateko, mondrafutboleskola@gmail.com helbidera idatzi.