Ointxe! saskibaloi taldeko kimu mailako neskek Valentzian jokatu zuten, pasa den asteburuan, Espainiako Txapelketa. 24 talde aritu ziren lehian, hiruko multzoetan banatuta. Beraz, lehen multzoan bi partidu jokatu zituzten arrasatearrek. Lehena, Mallorcako CB Pollenca taldearen aurka –Balear uharteetako txapelduna–. "Maila hobea eman genezakeen partidu hartan, baina ez ginen ondo sartu partiduan, eta ezin izan genuen irabazi", dio Alarciak.
Bigarrena Bartzelona handiaren aurka jokatu zuten. "Bigarren laurdenean hirugatik bakarrik gindoazen galtzen. Azkenean, 30 puntugatik galdu genuen, baina oso partidu borobila eginda".
Bigarren fasean, txukun
Multzoko azkena izan ostean, beste fase bat jokatzeko aukera izan zuten. Lehena CB Infante Murtziako aurkaria izan zen. "20-4 irabazten hasi ginen eta, azkenerako, 24 puntugatik galdu genuen. Horrek min eman zigun", azaldu du entrenatzaileak.
Hala ere, bigarrena eta hirugarrena irabazi egin zituzten. "Ardoiren aurka hirugatik irabazi genuen, murtziarren aurkako jipoiari buelta eman ostean. Eta azken partidua Lauro bizkaitarren aurka izan zen, Euskadiko Txapelketako finalean bigatik irabazi genien, eta oraingoan hamarregatik".
Esperientzia aberasgarria
Entrenatzaileak adierazi du oso esperientzia aberasgarria izan dela hau taldeko jokalarientzat, eta indartuta atera direla datorren denboraldira begira. "Kimu mailan Espainian dagoen benetako maila ikusi dugu txapelketa honetan. Oso maila altua dago. Estatuko hiriburuetako taldeekin lehiatu dugu, teknika aldetik eta fisiko aldetik oso indartsuak diren taldeen aurka".
Udako campusa, datorren astean
Asteon, sanjuanetako campusa egin du Ointxe!-k, eta 20 neskamutiko aritu dira Iturripen. Astelehenetik egubakoitzera, berriz, udako campusa egingo dute, Musakolako kiroldegian. 2003 eta 2010 artean jaiotakoei zuzendutakoa izango da udako campusa, eta hauxe izango da egingo dutena: 10:00etatik 11:30era, taktika eta teknika entrenamendua; 11:30etik 11:50era, hamaiketakoa eta atsedena; 11:50etik 12:50era, jaurtiketa libreen, hirukoen eta bestelakoen lehiaketak; 13:00etik 14:30era, igerilekua; 14:30etik 15:30era, bazkaria; 15:30etik 16:00etara, atsedena eta ekintza ezberdinak; eta 16:00etatik 18:00etara, berriz ere entrenamendua eta zenbait ariketa. Izena emateko, 629 80 47 82 telefonora deitu –Eneko Mata–. Aste osoa bazkariarekin, 120 euro, eta bazkaririk gabe, 75 euro.