Espedizio zabala joan zarete Buenos Airesera?
CEACUA Espainia mailan frankismoaren krimenen inpunitatearen aurka lan egiten duen elkartea da, eta bertako delegazio baten baitan joan naiz, Arrasateko Udaleko ordezkari.
Zein izan da zure helburua?
Dakizun bezala, Arrasateko Udalak kereila kriminala jarri zuen frankismoaren krimenak ikertzeko. Epaileek hau bertan behera utzi ostean, bi errekurtso aurkeztu genituen: bata, Bergaran bertan, eta bestea, Espainiako Auzitegi Konstituzionalean. Espainiako justizian izan duen ibilbidea zein den ikusita, argentinar bidea bakarrik geratzen zitzaigun. Hala, Arrasaten batutako testigantzak Servini epailearen esku daude jada.
Epailea pertsonalki ezagutzeko aukera izan duzu. Nolakoa da?
Bada, 82 urte izan arren, energiaz beteta dago, eta Arrasateko Udalak persona non grata izendatu duen Martin Villari kontu hartzeko gogo itzela duela esan dit. Figura oso errespetatua da bertan, eta segituan jabetu zaitezke horretaz.
Zer gehiago egin duzue bertan?
Manifestazioetan parte hartu dugu, eta maiatzaren 25 mugimenduko ikur den Nora Cortiñas ere ezagutzeko aukera izan dugu.
