Lehenengo hogei minutuak "oso ondo" jokatu ostean, 0-7 aurreratu zen Igor Isasik zuzentzen duen taldea. Hala ere, atsedenaldira 5-7 joan ziren, eta bigarren zatian hautsi zen partidua. "Bigarren zatian, gu nekatuago geunden, jokoan ezin sartu, eta haiek behetik gorako bidea egin zuten, eta alde handiarekin galdu. Azken 15 minutuetan, hiru entsegu egin zituzten, eta hor joan zitzaigun partidua. Haiek ondo egin zuten haien jokoa, eta guk emandako abantailak ondo aprobetxatu zituzten". Hala, azkenerako, handia izan zen markagailuak erakutsi zuen aldea.
Itzulerako partidua, Mojategin
Kanporaketak bi partidutara izaten dira, eta oraindik ez dago ezer erabakita. Isasik berak onartu du aldea "handia" dela, baina ez du esperantzarik galtzen Arrasateko partiduari begira. Hori lortzeko, baina, adierazi du ezin dituztela pasa den asteko akatsak errepikatu. " Epailea ez zen oso fin aritu, eta gutako asko partidutik ateratzea eragin zuen horrek: protestak, haserreak... Ostean, borroka une bat egon zen eta bi taldeetako jokalari bana egotzi zituen epaileak. Epailearekin asko haserretu, eta partidutik atera ginen, epailearen erabaki bakoitza eztabaidatuz. Modu horretan ez dugu ezer lortzen. Kanporaketa gainditzeko, egin behar duguna da partidu borobila".
Isasik kanpoan pasa du astea, eta taldeak Julen Barrutiarekin prestatu du itzulerako partidua, 18 urtez azpiko entrenatzailearekin. "Egin beharrekoa zer den ondo baino hobeto dakite jokalariek, ez dago sekreturik, eta berdin dio ni egon edo Julen egon. Hori ez da aitzakia izango. Konfiantzaz beterik gaude. Badakigu guk ondo jokatzen badugu eta haien aukerak neutralizatzea lortzen badugu, aukerak hor daudela. Oso zaila izango da, baina aukera dugula sinistuta gaude".
21 jokalari inguru egongo dira jokatzeko moduan, eta lesio aldetik "nahiko ondo" iritsiko da taldea une erabakigarrira.
Iazkoa errepikatzen bada?
Pasa den denboraldian, ligako partiduan, aurkakoa gertatu zen Kanpanzar ARTk Padroviejo taldearen aurka Logroñon jokatu zuen norgehiagokan. "25-7 galtzen joan ginen eta 25-35 bukatu genuen. Horregatik diot edozer gauza gertatu daitekeela oraingoan ere, eta aukerak baditugula garbi dago", dio Isasik.