Irailaren 16ko epaiketa
Data horretan, Espainiako Entzutegi Nazionalean izango duten epaiketari dagokionez, honakoa aipatu dute: "Kezkaz bizi dugu makroepaiketa honek suposa dezakeena, baina ilusioz eta indarrez beteta gaude gure aurkako ekinbide judizial, mediatiko eta politikoari aurre egiteko". Dagoeneko lantaldeetan antolatu dira eta koordinazio bilerak egin dituzte, epaiketaren lan eskergari ahalik eta hoberen aurre egiteko. Bestalde, gaineratu dute, "elkar hartuz eta zainduz modu kolektiboan erantzungo diogu jazarpen honi guztiari".
Epaiketaren zereginak prestatzen hasi dira, lekukoak eta azpiegiturak lotzen, besteak beste. Horrez gain, adierazi dute "epaiketak suposatuko digun galera ekonomiko ikaragarria arintzeko moduak aztertzen ari gara". Horren harira, "epaiketa honen bidegabekeria ikaragarria salatu, jasotzen ari garen elkartasun guztia antolatu eta epaiketa honen oinarrian dagoen preso eta erbesteratuen egoera konpontzeko aldarrikatuz mobilizazio herritar indartsu bat abiatzeko prestaketak ere abiatu ditugu" azpimarratu nahi izan dute.