Arrasateko Udalak Baliabideen Gida argitaratu du, herrira bizitzera datozen biztanle berriak modu autonomoan aritzeko asmoz. 2018an adibidez, 287 pertsona etorri ziren Arrasatera bizitzera eta horietako batzuk ongi etorri bileran jaso zuten gida eta beste batzuk, berriz, Harrera Zerbitzuaren bitartez. Aurrerantzean, herrian erroldatzen den bakoitzak lau hizkuntzatan (euskara - gaztelera, euskara - urdua, euskara - arabiera eta euskara - ingelera) eskuragarri dagoen gida jasoko du.
Gaika antolatuta
Baliabide Gida gaika dago antolatuta eta zerbitzu bakoitzaren helbidea, telefonoa, helbide elektronikoa eta ordutegia daude jasota. Horrez gain, herriko baliabide guztiak Arrasateko plano batean daude kokatuta.
Gidak bestalde, honako gaien inguruko informazioa du: errolda eta biztanleentzako arreta, harrera zerbitzua, osasuna, hezkuntza, hizkuntzak, enplegua, etxebizitza, gizarte zerbitzuak, aholkularitza juridikoa, kultura, aisialdia eta kirola, hondakinak eta emakumea eta berdintasuna.
