Normalean klubetako talde nagusienek jasotzen dituzte arreta guztiak, baina aurtengo denboraldian ohorezko gazte mailako Mondra sekulako denboraldia egiten dabil. Izan ere, Mondrako harrobiko talde batek inoiz ez du halako lorpenik egin; gazte mailako taldea gertu dago ohorezko mailatik Euskal Ligara igotzeko.
Zuri-moreak euren multzoko onenak izan dira 30 partidutatik 20 irabazi eta bi berdinduta. 62 puntu eskuratu dituzte, eta bigarren sailkatuari 8 puntuko aldea atera diete. Eta zapatuko finalean Oiartzun izango dute zain, beste multzoko liderra, eta bolada izugarri onean dagoena –azken hamalau partiduak jarraian irabazi dituzte–.
Zaleen babesa gura dute Zubietan
Halako partidu garrantzitsu baten aurrean klubak ahalegina egin eta autobusa antolatu du zapatuko partidurako. Norgehiagoka 18:00etan izango da Zubietan, eta autobusa 16:30ean irtengo da Garibaitik (2 euro, Mondrako jokalariek doan joan ahal izango dute). Izena emateko, hemen.