Zuzeneko musika emanaldiak maite dituztenek aukera paregabea izango dute maiatzean egingo den Udaberri Musikaldiaren eskutik. Sei emanaldik osatutako kontzertu zikloa prest dago jada, bertako zein kanpoko musikariekin, eta horietako lehen biak asteburu honetan egingo dituzte. Bihar, Txanbela Otxotearen ahots landuak entzun ahalko dira, San Frantzisko elizan, 19:30ean. Zortzikotea Josean Vegak zuzentzen du eta 2017an sortu zen, otxoteen ondarea munduan zabaltzeko. Cincinnatiko (AEB) jaialdi batean egin zuten debuta eta aipatu beharra dago zortzi abeslarietatik bi arrasatearrak direla: Inaxio Olaizola eta Juan Bautista Agirre.
Etzi, ordea, Windu taldearen txanda izango da; Kulturateko areto nagusian, 19:30ean. Txirula eztiko laukote ezohiko bat da, zeinak nahasten dituen errepertorio historikoa eta oraingoa. 2016an kaleratutako Under Construction lehen lanarekin musika klasikoko entzuleen goraipamena lortu zuten.
