Urtero moduan antolatzaileek bi ibilbide prestatu dituzte, Arrasateko inguruetan. Luzeak 38 kilometro inguru ditu, eta 1.600 metrotako desnibel positiboa. Motzak, berriz, zortzi kilometro gutxiago izango ditu, eta gainditu beharreko desnibela ere txikiagoa izango da, 1.100 metrotakoa. Hala, ibilbideak iazkoaren antzekotasun handia izango du; ziklistak Anporreta, Etxaeta, Urkulu, Galarrixa, Bedoña eta Kurtzetxiki inguruan ibiliko dira, bidezidor ederretan.
Dagoeneko ez dago internetez izena emateko aukera, baina domeka goizean, proba hasi baino ordubete lehenago Zior-Ola elkarte kanpoaldean antolatzaileak egongo dira izenak hartzen. Hala, federatuek 20 euro ordaindu beharko dituzte, eta federatuta ez daudenek 25 euro.