Adin eta gustu guztiak asetzeko egitaraua prestatu dute San Andresko Jai Batzordeko lagunek. "Aurtengo antolaketan asko igarri dugu Porru-ren falta, erretiratu egin da eta. Beti bezala, nagusientzako eta txikientzako ekintzak antolatu ditugu, eta nagusien bazkarien 80 urtetik gorako 70 lagun elkartuko dira. Esfortzu handia egin dugu autofinantzaketa kanpainan, eta horri esker Parabellum eta Bourbon Kings taldeak ekarri ditugu".
Bost eguneko egitaraua
Apirilaren 30an egingo du eztanda jaiak, 17:00etan botako duten txupinazoarekin. 17:30ean, txokolate-jana egingo dute Plaza Berrian; 20:30ean, beatbox-a eta umorea batzen dituen BocaBeats taldearen ikuskizuna; eta 22:00etan, cricket dardo txapelketa Equs tabernan.
Eguaztenean, auto telegidatuen ikuskizuna, puzgarriak, meza, helduen bazkaria, tute txapelketa eta Antxon magoaren ikuskizuna izango dira.
Barikua tuper bazkariarekin hasiko dute. Ostean etorriko dira txikientzako tailerrak eta buruhandiak, eta, eguna borobiltzeko, rock kontzertuak, Arrasateko zigiluarekin: Libertad Condicional talde gazteak eta Kañeria 13 garagartzarrak joko dute; azken horiek auzoko fitxaketa bat izango dute gitarra jotzen.
Zapatuan, puzgarriak eta txarangak girotutako poteoa izango dituzte goizean. Ostean, herri bazkaria, poneyak eta bigantxak, eta baita kontzertuak ere: Parabellum eta Bourbon Kings.
Domekan, erraldoiak eta txistulariak kalera irtengo dira goizean, eta arratsaldean, mus txapelketa eta Potx eta Lotx pailazoak izango dira.