Maria Ubarretxena alkateak ekitaldiaren garrantzia azpimarratu du hasieran, eta aitortza hori egiteko zegoen beharra nabarmendu: "Arizmendiarrietak besteak beste, herriagatik egindako lanagatik soilik, bere lekua merezi duelako Arrasateko udaletxeko osoko bilkuren aretoan".
Jarraian, Arizmendiarrietaren Lagunak elkarteko kide batek hartu du hitza eta eskerrak eman dizkie Udal ordezkariei ekitaldiagatik. Jose Maria Arizmendiarrietaren lanak "herri hau eraldatu zuelako aitortza hori beharrezkotzat" zeukatela adierazi du, eta horregatik hain zuzen, proposatu zutela udaletxean bere omenezko erretratu bat jartzea.
Hitzaldien tartea apaizaren lobak, Jose Luis Arizmendiarrietak, itxi du, familiaren partez eskerrak emanaz omenaldiagatik. Hitzaldian zehar, Arizmendiarrietaren etorreratik Arrasateko herrian egindako eraldaketan klabe izandako hainbat ekintza aipatu dituzte apaizaren esaldi batzuekin batera.
Ekitaldi motza eta zuzena izan da, eta aretoa bete egin da. Arizmendiarrietarekin kooperatibaren hastapenetan lanean aritutako Jose Mari Ormaetxea ere han izan da.